Zer da Ulibarri?

Ulibarri programa

Ulibarri ikastetxeen hizkuntza normalkuntzaren gaineko programa da. 1996-1997 ikasturtean ipini zen martxan eta une honetan 400 ikastetxe inguru dira programan parte hartzen ari direnak. ULIBARRI programan sartutako ikastetxeek euskararen erabilera eta kalitatea indartzeko egiten dituzten ahaleginak berariaz babestuko ditu Hezkuntza Sailak. Ahal den neurrian, horrezaz gainera, euskararen erabilera zabaldu eta sendotzeko ekimenak baloratzeko irizpideetan lehentasuna emango zaie ikastetxe horiei. ULIBARRI programako ikastetxeen hizkuntza normalkuntzako proiektuek euskararen erabilera indartzea dutenez helburu nagusi, programan sartu nahi duten ikastetxeek, hortaz, beren hizkuntza normalkuntzako proiektua eratu beharko dute.

Berritzeguneetako Aholkularien

Lotura Interesgarriak

Azken albisteak

47. Udako Ikastaroak 2019 #ElkarEkin --> IZEN EMATEA IREKITA.

  1. 2019.05.17
  2. B01 HNA

47.Udako Ikastaroak: HEZKUNTZA arloko eskaintza.

UEUren 47. Udako Ikastaroen barne Hezkuntzarekin lotutako eta irakasleei zuzendutako ondoko jarduerak eskaintzen dituzte:

JARDUNALDIAK

  • Humanitate digitalak: aukerak, erakundeen rol berriak eta elkarlana. (Bilbo, ekainak 20).
  • Ikastolak eta Kooperatibismoa (I.Topaketa): publikotasun berri baten bila: komunitatea eta demokrazia parte-hartzailea.(Eibar, uztailak 8).

 
IKASTARO ETA TAILERRAK

  • Arazoetan Oinarritutako Ikaskuntza DBHko Natur Zientzietan: ingurumenari loturiko proiektuen diseinua. (Iruñea , ekainak 25-26).
  • NextCloud & Moodle: hezkuntzarako azpiegitura libreak garatzen. (Eibar, ekainak 27-28).
  • Kaixo Mundua: Teknologiaren erabileratik sormenera, konpetentzia digitala ikastetxean lantzeko estrategia eta baliabideak. (Eibar, ekainak 27).
  • Komunikazio Ez Bortitza: hastapeneko edukiak. (Eibar, ekainak 27-28).
  • Sormena lantzen: idatz dezagun ipuin laburra.(Baiona, uztailak 1-2).
  • Informatika desentxufatua: posible da informatika ikastea gailu digitalik gabe? (Baiona, uztailak 2-3).
  • Euskara gaitasuna lantzen: Euskara Batuaren Eskuliburuaren (EBE) aurkezpena eta erabilera eta euskarazko terminologia-lanaren normalizazioa. (Baiona, uztailak 3).
  • Euskaraz beti eta hobeki, hizkuntza landuz. (Baiona, uztailak 2).
  • Wikimedia lantegia 2019: Txori bat da? Hegazkina? Ez, Wikidata da (eta komikiak wikitzeko beste superheroi batzuk). (Donostia, uztailak 2).
  • Challenge yourself: zure ikasgaien azalpenak hobetu zenbait metodologia uztartuz. (Eibar, uztailak 8-9).
  • Familia-terapiaren hastapenak. Behaketa teoriko-praktikoa. (Eibar, uztailak 10-11).
  • Hizkuntza irakaskuntzan bide berriak: nola erabili ahozko komunikazioa eta simulazioak, lanerako hizkuntza irakaskuntzan. (Eibar, uztailak 10-11).

UEUk eta Nafarroako Hezkuntza departamentuak elkarlanean antolatutako ikastaroak:

  • Harremanak 3.0: gazteen sexualitatearen esku-hartzea espazio digitalean.
  • Gaitasunetan oinarritutako unitate didaktikoak. 
  • Euskararen erabileraren lanketa ikasgelan HH-LH. 

 
Ikusi elkarlanean antolatutako ikastaro guztien zerrenda: UEU eta Nafarroako Hezkuntza ikastaroak.

Ikastaroak irakasleentzat HOMOLOGATUTA daude.

Informazio gehiagorik nahi izanez gero, jo lotura honetara:

https://labur.eus/iZqTB

EuskarAbenturak baditu aurtengo 121 espedizio-kideak

  1. 2019.05.09
  2. B01 HNA

Euskal Herriko zazpi lurraldeetako nahiz diasporako 16 eta 17 urte bitarteko 121 neska-mutilek hartuko dute parte EuskarAbentura 2019 espedizioan. Taldeak euskararen lurraldea luze-zabal zeharkatuko du oinez, datorren uztailaren 1etik 31ra bitarte.

Iragan martxoaren 10ean (martxoaren 24ean diasporako, Behe Nafarroako eta Zuberoako neska-mutilen kasuan) itxi zuten EuskarAbentura 2019 espedizioan parte hartu nahi zutenek izena emateko epea.

Lan bat eta motibazio gutun bat igortzeko eskatu zitzaien. Lana burutzeko, hautagai bakoitzak hiru gai izan ditu aukeran:
> Maite ditut maite gure bazterrak: Euskal Herria eta aztarna ekologikoa.
> Joen-etorriak: migrazio mugimenduak.
> Errimak eta erritmoak: musika, kantak, dantzak, olerkiak, antzezpenak.

Inteligentzia mota ezberdinen araberako formatuak ere izan dituzte aukeran: Historikoa, Literarioa, Ikus-Entzunezkoa, Musikala, Plastikoa edota Sormen Digitala.

Lurralde bakoitzetik abenturara batuko ziren gazteentzako plaza kopurua aldez aurretik ezartzeko, lurralde bakoitzeko biztanleriak Euskal Herriko biztanleria osoarekiko suposatzen duen proportzioa hartu zuten kontuan, eta 121 laguneko taldera estrapolatu. Era berean, Euskal Herriko errealitate soziolinguistiko anitzen presentzia bermatzea eta neska/mutil proportzio orekatua lortzea ere finkatu zuten helburu gisa (%35 / %65-eko aldea, asko jota). Bestalde, bi leku gorde zituzten zortzigarren euskal probintziakoentzat. Dena dela, aurretiaz ezarritako kuota horietako batzuk betetzea ezinezkoa izan da lurralde batzuetatik behar baino eskaera gutxiago iritsi direlako (edo ezinbesteko baldintzak betetzen zituen bakar bat ere ez, Zuberoako kasuan).

Eusko Ikaskuntzako eta PuntuEUS Fundazioko 20 kide aritu ziren jasotako 263 proposamen eta motibazio gutunak ebaluatzen. Epaimahaiak originaltasun, estilo, teknika eta kalitate irizpideetan oinarritu du bere ebazpena.

Horrenbestez, une honetan, 121 gaztek dute EuskarAbentura 2019 espedizioan parte hartu ahal izateko lekua, guztiak 2002–2003 bitarte jaiotakoak. %65 neskak dira, eta %35 mutilak. Gaurtik hasita, astebeteko epea dute bermea ordaintzeko (berresteko). Atzera egin eta ezezkoa emanez gero, itxaron-zerrendan geratu diren gazteek eskuratu ahal izango dituzte haiek libre utzitako lekuak.

Informazio iturria

IVAp-ek bere webgunea berritu du

  1. 2019.05.09
  2. B01 HNA

IVAP-ek bere webgunea berritu du, Internet lotura: 

https://labur.eus/JdQZW

Bertan aurkituko dugu, besteak beste, Itzultzaile Zerbitzu Ofizialaren Itzulpen eta berrikusketa irizpideak dokumentuaren azken bertsioa:

https://labur.eus/l3qEe

Getxolinguae 2019

  1. 2019.04.12
  2. Bo1 HNA

Hauxe da aurtongo Getxolinguae-ren edizioaren izenburua:

Eskolatze-hizkuntza eraikitzen: eskolan irakurtzen, idazten, hitz egiten.

Aurrekoan bezala Bilbon izango da.

Aurkezpenak dakartzak hitzak:

"Eskolatze-hizkuntzak berariazko trataera didaktikoa behar du, bai eskolatzearen hasierako urratsetan hizkuntzen inguruan hartu beharreko erabaki didaktikoak zehazteko, bai arlo guztietan hizkuntzen trataera integratuan eta integralean sakontzeko. Hizkuntza akademikoa, harremanetako hizkuntza ez bezala, abstraktua, testuingurutik kanpokoa, formala da eta terminologia eta hizkera espezifikoak ditu. Beraz, lanketa integratu eta integrala behar du ikastetxe mailan.

Jardunaldi honek hizkuntzak arlo guztietan duen garrantzia ikusaraztea du helburu eta jakintza-arloak eta hizkuntza elkarrekin uztartzeko moduak aztertuko dira bertan. Horrez gain, praktika onak ezagutu eta aukera izango dute bertaratuek beren gogoetak eta esperientziak partekatzeko."

Eguna: 2019ko maiatzaren 16a, osteguna
Ordutegia: 9:00-14:00
Tokia:  Bilboko ingeniaritza eskola (II) (Nola heldu)
Izena emateko

Aurreko edizioetako materiala eta aurtongo egitaraua Internet lotura honetan.

Informazio iturria: Berritzegune nagusia.

Common Voice, euskarazko auzolan digitala

  1. 2019.04.04
  2. B01HNA

Euskararen hizketaren ezagutzarako motor libre bat osatzea du helburu Librezalek sustatuko Common Voice ekimenak. Egun erabiltzen ditugun gailuak euskara ulertzeko gai izatea bilatzen da, hala nola, sakeleko telefonoak, ordenagailuak, telebistak, eta abar. Gailu ezberdinak hizketaren bidez erabiltzea oso arrunta bihurtu da, baina oraindik orain, gailuei erdaraz hitz egitea ezinbestekoa izaten da. Eta hori aldatzeko xedearekin jarri da abian ekimen hau.

Apirilaren 9an, asteartean, Iametza Interaktiboak eta Hirikilabs Tabakalerako kultura digital eta teknologia laborategiak antolatuta, euskaldunak batu eta urrats handiagoa emateko maratoia egingo dute. Horretarako, dei egiten diote euskaldun orori bertan parte hartzera, arratsaldeko 18:00etan, Hirikilabsen (Tabakalera, 3. solairua). Bertan, euskarazko grabaketak nola egin azalduko dute, eta komunitatean egingo dira grabaketak.

Lortuko den motorra ahots-mota desberdinak ulertzeko gai izan dadin, pertsona mota askotarikoak behar dira, genero, adin eta zonalde desberdinetakoak. Nahiz eta ekimena sustatzeko hitzordua egin den, edozein ordutan eta edozein lekutik har daiteke parte, edozein gailurekin.

Parte hartzeko, nahikoa da sakeleko telefonoa erabiltzea. Honako hauek dira jarraitu beharreko pausoak:

1. https://voice.mozilla.org/eu ireki nabigatzaile batekin.

2."Hitz egin" aukera sakatu.

3.Irakurri ozen agertzen diren esaldiak, jarraibideak kontuan hartuz.

Dagoeneko egin diren grabaketak balioztatzen ere lagun daiteke. Horretarako, "Entzun" sakatu beharra dago eta argibideei jarraitu. Oso erraza da eta ordenagailu batetik zein sakelako telefonotik egin daiteke. Hori bai, leku isil batean grabatzea gomendatzen da, grabaketek kalitate ona izan dezaten.

Librezale elkarteak ezarritako erronka, datozen hilabeteetan, modu boluntarioan 10.000 orduko grabaketak biltzea da.

Internet lotura honetan azalpenak dakartzan bideoa.

Informazio iturria: Tabakalera