Zer da Ulibarri?

Ulibarri programa

Ulibarri ikastetxeen hizkuntza normalkuntzaren gaineko programa da. 1996-1997 ikasturtean ipini zen martxan eta une honetan 400 ikastetxe inguru dira programan parte hartzen ari direnak. ULIBARRI programan sartutako ikastetxeek euskararen erabilera eta kalitatea indartzeko egiten dituzten ahaleginak berariaz babestuko ditu Hezkuntza Sailak. Ahal den neurrian, horrezaz gainera, euskararen erabilera zabaldu eta sendotzeko ekimenak baloratzeko irizpideetan lehentasuna emango zaie ikastetxe horiei. ULIBARRI programako ikastetxeen hizkuntza normalkuntzako proiektuek euskararen erabilera indartzea dutenez helburu nagusi, programan sartu nahi duten ikastetxeek, hortaz, beren hizkuntza normalkuntzako proiektua eratu beharko dute.

Lotura Interesgarriak

Azken albisteak

"Loraldia" jaialdiaren 4. edizioa aurkeztu da: 30 kultur hitzordu 22 egunetan

  1. 20018-02-23
  2. Pili Ikazuriaga

Atzo aurkeztu zen Bilboko Azkuna Zentroan Loraldia festibalaren laugarren edizioa, Lau sormen-haizetara lema pean. Festibalak 30 kultur hitzordu proposatzen ditu, euskal kulturaren berritzaileenak. Aurten 22 egunetan zehar luzatuko da, martxoaren 5a eta 26a bitartean. Tartean, diziplina artistiko guztiak, lau produkzio berri eta erabateko estreinaldiak eskainiko ditu, horietako batzuk berriro errepikatuko ez direnak, gainera. Edizio honetako festibala Bilboko 20 gune ezberdinetan gauzatuko da, inoiz baino espazio gehiago bereganatu dituela.

Loraldiaren aurtengo edizioa martxoaren 5ean hasiko da, euskal kantagintzari buruzko mintegi batekin; bukaera martxoaren 26an izango da, mintegi honen azken saioarekin. Eta bien bitartean, kultur sormenaren plaza bilakatuko da Loraldia festibala 22 egunetan zehar. Aurten diziplina artistiko guztiek lekua izango dute, formatu berritzaileak, inoiz baino egoitza gehiagotan eta ekoizpen propio eta estreinaldi handiak izango ditu festibalak. Guztira, ia 200 artistek parte hartuko dute jaialdi honetan.

Loraldia Elkartearen ildo estrategikoetan kokatu bezala, euskal kultur industria suspertzea eta sortzaileak ikusgarri jartzea ditu xede. Eta horretara zuzenduta dago prestatutako egitaraua.

"Artze, erreferente bat izan zen"

  1. 2018-01-15
  2. Pili Ikazuriaga

Bere heriotzaren berri izan eta berehala, Joxan Artzeren ekarpena nabarmendu dute askok eta askok.

Joxan Artzeren heriotzak ohiartzun handia izan du albistea eman denetik. Arrasto sakona utzi dute Artzeren olerkiek memoria kolektiboan, eta urteetan egindako lana eta lan hori egiteko modua goraipatu dute askok eta askok. "Erreferente bat izan zen. Hitzaren bitartez bizitzaren mugak traspasatzen saiatu zen", esan du Jose Angel Irigarai idazle eta poetak. BERRIAri egindako adierazpenetan Irigaraik esan du "kolpe latza" izan dela Artzeren heriotza; bai maila pertsonalean, baina baita poetak Euskal Herriari egindako ekarpenagatik ere: " Ez Dok Amairuren garaietatik kulturgile, sortzaile eta poeta izan delakotz. Berak ere bere marka utzi zuen. Batez ere poesia alorrean. Poeta handi bat joan zaigu", azaldu du.

Osorik

 

Haurrentzako liburu grafikoetarako ilustrazio eta narraziogintza tailerra urtarrilean Iruñean

  1. 2018-01-10
  2. Pili Ikazuriaga

Haurrentzako liburu grafikoetarako ilustrazio eta narraziogintza tailerra egingo dute urtarrilean Iruñean, Galtzagorri elkarteak eta Iruñeko udalak antolatuta. BIKOTEKA izeneko Liburu grafikoetarako ilustrazio eta narraziogintza tailerraren 2018ko edizioa Iruñeko Descalzos Kaleko Igogailuaren ondoko udal aretoan gauzatuko da urtarrilaren 29tik otsailaren 2ra. Bigarren urtean, tailerra berrikuntzekin dator: lau egun eta erdiz burutuko da oraingoan, eta haurrentzako liburu ilustratu bat nola pentsatu, idatzi, sekuentziatu eta marraztu lantzeaz gain, hau nola argitaratu ere jorratuko dute parte hartzeko hautatuak izango diren idazle eta ilustratzaileek. Gehienez 8 bikotek parte hartuko dute. Idazle eta ilustratzaileek urtarrilaren 15a arte dute dokumentazioa bidaltzeko aukera. Ekimen hau Haurrentzako Album ilustratuak sortzeko Etxepare Sariaren laguntzari esker burutuko da.