Azken albisteak
XXVII. ESKOLA HIZTUN BILA JARDUNALDIA: “Hiztun jabetuak eskolatik eraikitzen: hizkuntza, kultura, arrazoibidea”
400 profesionaletik gora elkartu zituen EHB jardunaldiak Gasteizen azaroaren 10ean, gako didaktiko-metodologikoak, euskal kulturaren transmisioa eta ezagutza soziolinguistikoa ardatz hartuta.
Hizkuntza normalkuntzarako Ulibarri programan parte hartzen duten arduradunei zuzenduriko jardunaldia da Eskola Hiztun Bila. Formazioa eta esperientzia trukaketa izan ditu helburu, urtez urte.
Aurtengo edizioan ikasle guztiek euskara hizkuntzan irteera-profil egokia lortzeko hiru zutabe hauen garrantzia azpimarratu zuten adituek: hizkuntzak irakasteko planteamendu didaktiko-metodologiko eraginkorrak, euskal kulturaren transmisioa eta oinarrizko ezagutza soziolinguistikoa.
“Hizkuntza, kultura, arrazoibidea” lana oinarritzat hartuta, kokatze lanak egitea egokitu zitzaion Ibai Zabalari, IRALEko irakaslea. Euskara irakasteko metodologia eta gako didaktikorik eraginkorrenak zeintzuk izan daitezkeen azaldu zuen Roberto Mielgok, Begoñako Andra Mari Irakasleen Unibertsitate Eskolako (BAM) irakasleak. Ibai Iztuetak berriz, euskal kultur transmisioari buruz hitz egin zuen. Eta azkenik, Euskaltzaindiako kide eta Mondragon Unibertsitateko HUHEZI Fakultateko Jon Sarasua irakasleak ezagutza soziolinguistikoari heldu zion.
Atsedenaldiaren ondoren, hiru hizlarien arteko mahai-ingurua entzuteko aukera izan zen. Jardunaldiaren bigarren zatian, ikastetxeetan gauzatzen ari diren hiru praktika on aurkeztuko ziren. Hiru zutabeak berriz ere kontuan izanik, Arrigorriaga BHIk planteamendu didaktiko-metodologikoa bat aurkeztu zuen, Arratiako 9 ikastetxeek aurkeztutako praktikak kulturaren transmisioarekin egiten zuen lotura, eta Arrasate BHIk aurkeztutakoak ezagutza soziolinguistikoarekin.
Jardunaldia ixteko Ibarrekolanda BHIko Batxilergoko ikasleek “Gernika” antzezlana taularatu zuten. Joseba Sarrionandia poemaren egileak berak eman zion sarrera azken gozagarriari.
“Idazleak Ikastetxeetan” eta “Ikas2deak” programetan parte hartzeko epea zabalik
Euskal Idazleen Elkartea (EIE) eta Hezkuntza Sailak elkarlanean sortutako programa da Idazleak Ikastetxeetan. Idazleek ikastetxeetara bisita egiten dute beraien lanen baten gainean hitz egiteko. Ikastetxeetan literatura-zaletasuna bultzatu, euskal idazleen obren zabalkundea egin eta gero eta mundu teknologikoagoan idazteari leku propioa aurkitzea dira programa honen helburuetako batzuk.
- Epea: 2023/10/09 – 2023/11/19
- Izen ematea: Euskal Idazleen Elkarteko webgunearen bitartez egin behar du eskabidea. ESKABIDEA
- Informazio gehiago: https://www.nolega.euskadi.eus/es/idazleak-ikastetxeetan
Ikas2deak programaren bitartez, lanbide desberdinak ezagutzeko eta lana euskaraz egiten duen jendearekin egoteko aukera paregabea eskaintzen zaie ikastetxeei. LHko 5. eta 6. mailako, DBHko eta Batxilergoko ikasleei zuzendutako ekimena da.
- Epea: 2023/10/09 – 2023/11/10
- Izen ematea: HEMEN
- Informazio gehiago: https://www.nolega.euskadi.eus/es/ikas2deak
Primeran euskarazko streaming plataforma martxan da
Irailaren 15ean jarri zuten martxan Primera Plataforma, euskarazko ikus-entzunezko anitzak nahieran ikusteko plataforma digitala. Azkeneko bi urteetan horretan aritu dira lanean “Euskara eta euskal edukiak zabaltzeko filosofiarekin, mundura zabalik dagoen euskal leiho berria izateko”
Primeran plataforma doakoa da eta edozein eduki ikusteko erregistratu beharra dago. Plataformaren katalogoan 3.000 atal edo film baino gehiago daude ikusgai. Horietako gehienak euskaraz ikus daitezke, euskarazko audioarekin edo euskarazko azpidatziekin. Unai Iparragirre ETBko zuzendariak ekainean BERRIAri azaldu zionez, edukiaren %99 egongo da euskaraz ikusgai. https://primeran.eus/
NOLEGA dirulaguntza deialdia eta Musikariak Ikastetxean: epea zabalik.
Ikastetxeko giroa euskalduntzeko NOLEGA dirulaguntza deialdia zabalik dago. Urriaren 2a izango da azken eguna dirulaguntza eskatzeko. Informazio gehiago, hemen:
https://www.nolega.euskadi.eus/es/nolega-deialdi-bateratua
Halaber, zabalik dago Musikariak Ikastetxean programaren barruan musikariak eskatzeko aukera. Informazio gehiago, hemen:
https://www.nolega.euskadi.eus/es/musikariak-ikastetxeetan
Zer behar dute gazteek?
Euskalgintzaren Kontseiluak eta Eusko Jaurlaritzaren Hizkuntza Politikako Sailburuordetzak euskararen etorkizunaren inguruko gogoeta jardunaldiak antolatu dituzte ekainaren 1ean eta 2an: Zer behar dute gazteek? Euskaratik ditugun erronkak aletzen.
Zein dira gazteentzako euskara hizkuntza-hautu erakargarri egiteko sustatu beharreko ildo eta politikak? Zein dira epe ertainean datozen aldaketa eta erronkak? Gazteek zer diote honen guztiaren inguruan? Hauek eta beste hainbat galdera aletzen saiatuko dira gazte eta arlo ezberdinetako adituak.
Informazio gehiago eta jardunaldietako egitaraua ondoko web orrian aurki daiteke: https://kontseilua.eus/es/
SPOTIFY EUSKARAZ
Aldaketak gertatu dira aste honetan Spotify musika aplikazioa irekitzerakoan: maiatzaren 15etik aurrera “Egun on” opa dizu aplikazioa ireki bezain laster.
Aplikazioak hamaika hizkuntza berri sartu ditu ezarpenetan. Haien artean galegoa eta gurea, euskara! Guztira 74 hizkuntza aukera eskainiz.
Musika entzuteko aplikazioaren ezarpenak euskara aldatu nahi baduzu jarraitu hurrengo lotura hau: https://support.spotify.com/us/article/change-language/
IRALE: 23-24 ikasturtean ikastaroetan izena emateko deialdia
Argitaratu da IRALE ikastaroetan parte hartzeko deialdia. HEMEN, informazio osoa.
IRALEren webgunean infromazio osoa aurkituko duzue: https://irale.hezkuntza.net/eu/inicio1
Izena emateko epea: apirilaren 19tik maiatzaren 11ra.
Paperjale: euskal literaturaren topagunea izan nahi duen sare soziala
Abaraska taldeak euskal idazle eta irakurleentzat sare sozial libre berria sortu du: Paperjale.eus plataforma.
Hiru helburu dituen proiektua da; irakurzaletasuna sustatzea, literaturzaleentzat gune segurua sortzea eta euskal idazle eta irakurleentzat topagunea izatea.
Irakurzaleek aukera izango dute liburutegi pertsonala online sortzeko, irakurketak erregistratzeko, liburuak puntuatu eta iruzkintzeko, beste erabiltzaile batzuk jarraitzeko edota liburuen gomendioak jasotzeko. Horrez gain, literaturari buruzko eztabaidak ere antolatuko dituzte.
EUSKAL SOZIOLINGUISTIKA JARDUNALDIA
GAZTEAK MINTZO: DISKURTSOAK ETA ETORKIZUNEKO PROIEKZIOAK
Martxoaren 23an, Hendaian izango da Soziolinguistika Klusterrak antolatutako aurtengo Soziolinguistika Jardunaldia.
14-20 urte arteko gazteek euskararekin duten harremana zein den ezagutu eta aztertuko da. Euskararen egoerari buruz duten iritzia, euskara zein bizipen baikor eta ezkorrekin lotzen duten, euskararen aldeko mugimendu sozial eta kulturalak nola hautematen dituzten, helduen diskurtsoez duten ustea… gai horien inguruan jardungo dute ikerlari, teknikari irakasle eta euskararen aldeko hainbat ekintzailek.
Izen-ematea eta informazio gehiago www.soziolinguistika.eus/jardunaldia webgunean aurki daiteke.
GURASOENTZAKO GIDA: “ESKOLAN, KALEAN ETA ETXEAN, EUSKARA LAGUN”
Euskararen erabilera sustatzeko Gasteizeko Udalak eta Arabako Foru Aldundiak, hainbat guraso-elkarterekin batera, Gurasoentzako gida: “Eskolan, kalean eta etxean, euskara lagun” aurkeztu berri dute. Liburuxkak 1-10 urte bitarteko seme-alabak dituzten familiak euskalduntze prozesuan laguntzea du helburu.
Gurasoei lagungarriak egingo zaizkien aholkuak eta jarraibideak eskaintzeaz gain, seme-alabei laguntzeko jokabideak eta ekintzak ere aurkitu daitezke gidan.
